آخر تحديث: أكتوبر ٢٠٢٦. الصفحة دي بتشرح بلغة بسيطة إيه البيانات اللي موقع كبابجي كارم بيتعامل معاها وليه.
البيانات اللي بنجمعها
- لما تطلب: الاسم ورقم الموبايل. مفيش حساب ولا كلمة سر.
- لما تطلب توصيل: العنوان اللي بتكتبه وموقعك على الخريطة (الدبوس اللي بتحطه)، علشان نحسب رسوم التوصيل ونوصّلك.
- طلباتك: الأصناف والأسعار والتاريخ وطريقة الدفع وحالة الطلب والتقييم لو قيّمت.
- الدفع بـ InstaPay أو المحفظة: بتحوّل من تطبيقك إنت، والموقع مش بيشوف ولا بيخزّن أي بيانات بنكية. صورة التحويل بتبعتها لنا على واتساب، ومش بتتخزن على الموقع.
- فورم الكاترنج: اللي بتكتبه فيه (الاسم والموبايل وتفاصيل المناسبة) بيتبعت لنا على واتساب بس، ومش بيتخزن على الموقع.
ليه بنستخدمها
- نجهّز طلبك ونوصّله ونتواصل معاك بخصوصه.
- نحسب رسوم التوصيل ونتأكد إنك جوه منطقة التوصيل.
- نعمل تقارير لصاحب المطعم عن المبيعات والطلبات.
مش بنبيع بياناتك، واسمك ورقمك وعنوانك مش بيتبعتوا لأي جهة إعلانية.
مين يشوف بياناتك
إدارة المطعم والكاشير المصرّح لهم بس، من خلال لوحة التحكم المحمية بكلمة سر. والموقع شغّال على خدمات Cloudflare (الاستضافة وقاعدة البيانات).
خدمات خارجية بيستخدمها الموقع
- Google Fonts: لتحميل الخطوط، وبيشوف عنوان الـ IP بتاعك زي أي موقع.
- OpenStreetMap: لعرض الخريطة وقت اختيار موقع التوصيل.
- واتساب: لما تضغط على زر واتساب بتتحول لتطبيق واتساب وبيطبّق عليه شروطه.
- Meta Pixel (فيسبوك وإنستجرام): لما المطعم يكون عامل إعلانات، الموقع بيبلّغ فيسبوك إن حد فتح صنف أو ضافه للسلة أو طلب وبكام، علشان الإعلانات توصل للناس المهتمة وتعرف تقيس نتيجتها. مفيش اسم ولا رقم ولا عنوان بيتبعت. فيسبوك ممكن يربط ده بحسابك عنده حسب إعداداتك هناك، وتقدر تقفل ده من إعدادات الإعلانات في فيسبوك أو بمانع الإعلانات في المتصفح.
اللي بنخزّنه على جهازك
بنحفظ على موبايلك بس اللي يسهّل عليك الطلب: سلة الطلب الحالية، واسمك ورقمك وآخر عنوان كتبته علشان يبقوا مكتوبين المرة الجاية. تقدر تمسحهم من صفحة إتمام الطلب بزرار «مش أنا؟». ولو المطعم مشغّل Meta Pixel، فيسبوك بيحفظ على المتصفح الكوكيز بتاعته (شوف فوق).
مدة الاحتفاظ
بنحتفظ ببيانات الطلبات بالقدر اللي محتاجه المطعم لتسجيل مبيعاته. لو طلبت تمسح بياناتك، بنشيل اسمك ورقمك وعنوانك وملاحظاتك ومكانك على الخريطة من طلباتك القديمة. اللي بيفضل هو الأصناف والمبالغ بس، من غير أي حاجة تعرّف إنها بتاعتك.
حقوقك
تقدر تطلب تشوف بياناتك أو تصحّحها أو تمسحها. كلمنا على أرقام المطعم وهنساعدك:
01277791553 · 01004623300 · 057 3452956
تعديلات على السياسة
لو غيّرنا حاجة في الصفحة دي هنحدّث تاريخ آخر تحديث فوق.